दि. 10-5-2022 गोर भाई-भेनो, दशमणेवूती सावध रो गोर भाई-भेनो, लोकशाहीम देशेरी घटना, कायदे प्रमाण देशेरी सारी अनतारो समान विकास करते रेहेरो परम, मुख्य कर्तव्य सरकारेरो छ. पण भारतेन सता मळी जनाती देशेर अति अल्पसंख्य समाज विशेष करन जाती, धर्मवादी, श्रेष्ठवादी, सिको हुओ, श्रीमंत, नोकर म्हणजे अधिकारी, मंत्री, उद्योगपती, कारखानदार, संस्था, संघटना, सहकारक्षेत्र, पक्षेवून काम करेवाळ ठराविक समाजेर लोक छ. बाकी वंचित वर्ग फक्त कष्टकरी छ. ये वंचित वर्गेम अनुसूचित जमाती म्हणजे आदिवासी, भटके, इतर मागास (अलुतेदार-बलुतेदार) लोकुर समावेश छ. बाकीरो सता, संपत्ती, शिक्षण, उद्योग, व्यापार नौकरीरे माध्यमेती मलीदा खायेवाळो कष्ट न करता देशेरी गरीबेरी हक्करी तिजोरीपर डाको घज्ञलेवाळो, तलुटेवाळो भोगवादी, विलासी जीवन जगेवाळो समाज प्रस्थापित, अभिजन मानो जावछ. ये प्रस्थापित, अभिजन समाजेम बामण, बनिया, पारसी, गुजराती, राजपूत, ठाकूर, 96 कुळी मराठा असे ...समाज आवछ. देशेर सारीच साधन संपत्तीरो उपभोग, फायदो नवद टक्का येच समाज लेरे छ. बाकी कष्टकरी बहुजन समाज, वंचित समाज खेती, जनावर पालन, बांधकाम, खोदकाम, हमाली, देश रक्षण, वस्तुवूरो निर्माण करेर बाद भी जनावरेती बी बेकार, गुलामी, वेठबिगारी, बेकारी, भूकमरी, पेटभरेसारू भटको जीवन जगरोछ. देशेरी तिजोरीम 90 टक्का पिसा वंचितेरोच छ. पण ये आयती तिजोरीर मालक सापेप्रमाण प्रस्थापित वर्ग वेन बेठोछ. यी प्रस्थापित समाज केवळ प्रस्थापितरेच सारी क्षेत्रेम विकास कररोछ, अन वंचितेवूरो सारी क्षेत्रेम शोषण लुट कररोछ. वंचित वर्गेन शिक्षण, सता, संपत्ती, साधनेवूती घणम रखाडन गांडपणेरो राजकारण कररोछ. कारण ये लोक बहादूर छेनी. देशेन ये प्रस्थापित वर्गेरो कोई योगदान छेनी. यी प्रस्थापित वर्ग सामाज, देशद्रोही छ. वंचित वर्गेवून शिक्षण, सत्ता, संपत्ती, साधनेवूम हिस्सो देये ऐवजी स्वास्थ्य सेवा देये ऐवजी सुंदर शहर, पुतळा, क्रिडा स्पर्धा, मंदिर निर्माण, कुंभमेळा, उडानपूल, हायवे, तिर्थक्षेत्र, भाजपचे प्रत्येकी गांव, तालुका, जिल्हा स्थळी कार्यालय, खाजगीकरण, सेझ, मॉल्स निर्माण करन वंचितेर तिजोरीरो दुरोपयोग कररोछ. शेतकरी, आदिवासीवूरी जमीन प्रस्थापित वर्ग हडप करन वंचित वर्गेरो अस्तित्वच मिटायेरो कपट कारस्थान रचो जारोछ. उपरेर सारी प्रस्थापित, जातीधर्मवादी, श्रीमंत, सताधारी वर्ग वंचितेवून घटना, कायदेप्रमाण वागणूक न देता केवळ कष्टकरी बनायेरो प्रयत्न कररोछ. शिक्षण, सता, संपत्ती, साधनेवूती घझम रखाडन अस्पर्श, गुलाम बनायेरो ठेरा मेलो छ. उपरेर सारीच समाज वंचितेवून कराईच अपवाद वगळन मतदान करेनी. फुट पाडन, साम-दाम, दंड नीतीरो वापर करन वंचितेन हाटायेरो, पाडेरो अन प्रस्थापितेन जितायेरो काम करछ. करन उपरेर सारी लोक, समाज, वर्ग यी वंचितेरो खरो दशमण छ. कारण ये प्रस्थापित लोक शहर वस्तीम रछ. शहर वस्तीम अच्छे, उच्च, दर्जेदार अन मेहंगे शिक्षणेर व्यवस्था, विजपुरवठा, स्वच्छ पाणी, दवाखाना, रस्ता, स्वच्छता, बाजारपेठ, ग्रंथालय, विश्रामगृह, स्वच्छतागृह, मनोरंजन, सभागृह, वगैरेर मनमानी व्यवस्था कर मेलेछ. पण गामेम, तांडा, वाडी, माल वस्तीम उपरेपैकी एकही व्यवस्था छेई. धन, वंचितेरो अन व्यवस्था मात्र धनवानेर, यी कतरा मोठो अन्याय अन स्वार्थीपणो छ. वंचित वर्गेन कहा कोनी कळन आरो. वंचितेरे शिक्षण, आरक्षण, प्रतिनिधित्व, क्रिमीलेअर, विनयभंग, बलात्कार, अन्याय, अत्याचारेर विरोधेम वंचिते बरोबर यी प्रस्थापित वर्ग कराई रोडपर, मोर्चा, आंदोलनेम उतरेनी. उलट उपरेर सारी वातेवूरे, अन्यायरे समर्थन ये लोक करछ. भाजप, आरएसएस, शिवसेना वगैरेन तो देशेर घटना आरक्षण, मतदान, राष्ट्रध्वज, राष्ट्रभाषा, भारतदेश नाम, मुसलीम, इसाई येनेरो नागरिकत्वच मान्य छेनी. वंचितेर दलाल, चाटूकार, पाले हुये कत्री कत्रा तीतर येनून भ्रमित करन प्रस्थापित वर्ग आजतानी सता भोगरोछ अन वंचित वर्ग मात्र विचार, चिंतन न करता, हक्क अधिकार सारु संघटित बणन सता हातेम लेये ऐवजी प्रस्थापितेर जोडा वठान हिंडरेछ. स्वाभिमानेरो त्याग करन गांडूप्रमाण गुलामी करेम धन्यता मानरेछ. देशेन स्वास्थ्य मळान देयेवाळ सारी वंचित वर्ग अन वंचितेवूर नेता, समाज सुधारकच छ. येनेरो सपनो पुरो करेर विय तो सारी वंचितेवून प्रस्थापितेवूरो दशमनेवूरो विरोध करन वंचितेवूर सता निर्माण कररेर खर गरज छ. जर वंचित संघटित न हुये तो गुलामी अखंड बनी रेहेवाळ छ. करन करो, मरोर लढाई अब अति आवश्यक छ. इति. जय भारत - जय संविधान प्राचार्य. ग.ह. राठोड