दि. 26/05/2022 सत्यरी वळख करलो देश चलायेरो कायदो विश्‍वरत्न डॉ. बाबासाहेब आंबेडकर भारत देशेन दिनो। कायदो देयेरे आंघ डॉ. बाबासाहेब आंबेडकर तथागतेन अपणो गुरू मानो। तथागत विश्‍वमान्य धम्म तत्त्वज्ञज्ञन मानव कल्याणार्थ सारी जगेन दिनो। धम्म तत्त्व ज्ञानेरो रूचकर मसालो, डॉ. आंबेडकर देशेरी घटनाम भर दिनो। देशेरी घटना आधारे जगभरेर पीडित, वंचित, बहिष्कृतेवून न्याय मळो। दु:खेर वात यी छ की वंचितेवून ना धम्म कळो, ना घटणार प्राणतत्व कळो। धम्म अन घटना केरीछ सारी वंचितेवून, सारीर सारी वंचित एक जाग भळो। वंचित, पीडित, बहिष्कृतेरी बेकीरे कारण, मनुवादिवूरो बना कष्टेरो पाकरोछ मळो। वंचित, पीडित, बहिष्कृतेरी एकीती, वंचितेरो सत्ता, संपत्तीसे फुलीय मळो। प्रा. ग.ह. राठोड सारी वंचितेवून आवाहन कररो, तम हिंदुत्वेर त्याग करो। सारी वंचित, बहुजन भळन, धम्म संविधान तत्त्वज्ञान एके विचारेती स्वीकार करो। धम्म संविधान तत्त्वज्ञानेम छ, गोर धाटीरो जीवनदायी अमृतारसा भरो। धाटीरूपी धम्म-संविधान नामेरे रसेन न हिचकता गटागट पियेरो करो। देव, दैव, धर्म, जात नामेरे कर्मकांडेवूम छ, वंचित, पीडित, बहिष्कृतेवूरो शोषण भरो। वंचित, पीडित, बहिष्कृत बहुजन, विचारी विय तो सारी मारी वातेवूप गौर करो। प्रा. ग.ह. राठोड, अध्यक्ष - अखिल भारतीय गोर बंजारा साहित्य संघ, भारत.