दि. 19/12/2022 धाटी जिंदाबाद जिंदाबाद जिंदाबाद वंदनीय पिताजी प्रा. ग.ह. राठोड यांचे अभ्यासपूर्ण अति चिंतनीय विचार :- गोर छो तो गौर करो, म्हणजे विचार करो. विचार, चिंतन, मंथन करनच आंघ बढो. इच सत्य वात वंदनीय सेवालाल बापु सुद्धा केगोछ, जाणजो, छाणजो, पछज मानजो, यी बापुरो अमर कथन अनेक वेळा विचार करन गोर समाजेन आंघ बढे करता अचूक सुत, नियम छ. विचार यी गोर समाजेरो, गोर धाटीरो, गोर जीवन शैलीरा मुळ महान मंत्र छ. मंत्र, विचार, सुत्र, नियम, कायदो, कर्तव्य, घटना (संविधान) ये समतावादी समानार्थी शब्द छ. येनच स्वार्थी, परोपजीवी, श्रेष्ठवादी, द्वेषी समाज धर्म नाम दे मेलोछ. धर्मवादी लोक भांडवलवादी, विषमतावादी, शोषक, लुटारु, फसवे, निरर्थक काल्पनिक, विकृत, विसंगत, शोषणयुक्त देव-देवीवादी, कर्मकांडवादी, भाग्यवादी, पूजा, प्रार्थना, आरती, अभिषेक, यज्ञयाग, स्वर्ग-नरक, मुहूर्त, शुभ-अशुभ, भविष्य, साडेसाती, गृहकलह, दान-दक्षिणावादी, मनु पुराणग्रंथवादी, जात-वर्णवादी छ. येरे उलट धाटीवादी केवळ प्रकृती, पूर्वज, पशु, वृक्षवेली, नदी डुंगर, पर्वत, समुद्र वंदक छ. धाटीवादी निरर्थक खर्चिक साधनयुक्त दक्षिणा अपेक्षा छेनी. धाटी सनातनी छेनी. धाटी ठिकाण, काळ, वेळानुसार परिवर्तनीय, पारदर्शक, न्याय, समतापूर्ण अन अलिखित मुखपाठ रूपेम लारेरे नऊ हजार सालेती जीवंत छ. धाटी धर्म छेनी. धाटी एक अविकृत, शुद्ध, पारदर्शक जीवनशैली छ. धाटी निर्मितीरो काळ आजेती नऊ ते सात हजार साल जूनो छ. जगेरे सारी धर्मेरो निर्माण काळ आजेती फक्त 2022 सालेरो करतो छ. धाटी जीवनशैली सामाजिक छ. धर्म मात्र धंदो, पुजारी, भटजीवूरो उत्पनेरो साधन रोजगार हमी योजना अन बगैर कष्टेर खेती छ. सारी धर्म अन्याय, अत्याचारेती काठोकाठ लबालब भरे हुये अन मानवी दु:ख, विषता, फुट, लुट झूटेरो एक मात्र साधन छ. धाटीरो अन धर्मेवूरो कती बी लटा आतराबी संबंध छेनी. आजेतानी अनेक राजा अन सताधारीवूरो नीती, धोरण, कायदेवूरे कारण अन बेकारी, गरिबीरे कारणेती धाटीवादी चूकन धर्मवादी बनगेछ, यी सत्य छ. पण धर्मेरो नाम सुद्धा लेणू यी अपराध छ. कारण धर्म धाटीर बराबरी कराई कर सकेनी. धर्मेम घुसखोरी करणू म्हणजे अंगारम कुदन, गुलामीम फसन सौता स्वयंघात कर लेणू छ. धाटीरो फळ ताबडतोब मळछ. धर्मेर परिणाम मात्र न कळत वेते दखावछ. देमा गुरू, लाखाबापु, गोविंद गोर सेवालाल बापु, नायक बापु ये कोई मूर्तीपूजा, मंदिर-तिर्थक्षेत्र निर्माण, यज्ञयाग, 10 वा, तेरावा, सत्यनारायण, तीर्थयात्रारो, गणपतीमेळा, लक्ष्मीपूजा, हनुमानपूजा, भटजीरो सन्मान, मान, पगु पडेरो समर्थन कराई कोनी किदे. जर गोर समाज उपरेरी सारी वाते कररे विय तो यी गोर महामानवेवूर, धाटीरो महान अपमान अन अपराध गुन्हो समजो जायी चाहिए. करता विनंती छ, की यी संदेश अनेक वेळा वाचन, चिंतन, मंथन करन धर्मेरे आंघ धाटीरे आधारेपर सारी समाज सुखी समाधानी वेततो. पछ आज पक्षपाती, शोषक, गुलाम बनाये वाळे धरमेर समर्थन करणु यी सेती मोटो मूर्खपणो सारजो अन धाटीन जीवनदायनी मानन ओरो स्वीकार करो यीच सारी गोरूती अपेक्षा करुछू. तथागत बुद्धेरे आंघ 27 बुद्ध वेगे. सिद्धार्थ गोतम 28 वो बुद्ध छ. सारीर सारी बुद्ध धाटीवादी वेतते. येनेरे काळेम कोई धर्म कोनी वेततो धम्म यी धर्म छेनी. धम्म यी नैतिक नियम, कायदो, कर्तव्य, घटना (संविधान), धाटीरो प्रतिरुप वेततो. करनच गोर विचारी, विद्वान, पुढारी, नायक मानो जावछ. तांडा नायक पंचायत यीच आजेरी लोकशाहीरो स्वप्न छ. करनच गोर समाज गोर धाटी, गोर जीवनशैली यी सारी धर्मेती अन सारी वादेती म्हणजे विचारधाराती श्रेष्ठ मानन गोरधाटीर, गोर जीवनशैलीरे बचाव अन संरक्षणेर अन धर्म त्यागेर सारी गोर भाईभेन प्रतिज्ञा करेर आजेर सेती मोट गरज छ. जय गोर - जय धाटी - जय संविधान राजपालसिंह राठोड.