03/12/2021 जन्म दनेर एक खास संदेश गोर भाई-भेनों, सारीन क्रांतिकारी वंदन. मारो तर्क किंवा विचार छ, की, आप आपणे जन्म दनेन वाढ दन न केता हमेशा जन्म-दनच केते रेही चाय. कारण जन्मदन यी आयुष्यरो वाढ दन न रेता, घटते आयुष्यरो दन रछ. करन जन्मदन येन वाढ-दन न केता आयुष्य घटते दनेर विचार करन आपण आयुष्यम काई अच्छो अन काई बला किदे येर सिंहावलोकन करन अपनी आठवण समाजेम घणे दनेतानी कु टकी रिय येरो विचार करते सद कर्म करते बाकीरो आयुष्य खर्च करेरो चिंतन वेयी चाय, असे मार विचार छ. दूसर वात म्हणजे घटते उमरेन वाढ-दन केणू अन केक काटणू यी भारतीय संस्कृती न रेता विदेशी संस्कृति किंवा संकल्पना छ, अन चूकीर संकल्पना छ. यी संकल्पना मुळ संकल्पनार एकदम विरुद्ध अन अविचारी छ. ये दन मनचाय तो योग्य आनंद, कार्य करी चाय भळण सहभोजन करी चाय. पण हपी बर्थडे ऐवजी याडी उपकार समजन, याडी उपकार-दन मनाई चाय अन याडीरो उपकार प्रत्येकेन कु फेडतु आय येरो विचार करन जन्मदनी याडीरोच सत्कार वेयी चाय, अस मारी एक नवी संकल्पना छ. येपर विचारमंथन अवश्य वेयी चाय. पण यी संकल्पना सर्वोत्तम छ, असो मारे मनेन वाटच. याडी बरोबरच बापेरो सुद्धा आदर वेयी चाय. यी संकल्पना गोर समाजेम बेटा बोडी भळण याडी बापेन अंघोळी करायरो नियम गोर समाजेम वेततो. नवलेरी ये कामेम पुढाकार लेतीती. पण वरले काळेम यी परंपरा जवळ जवळ खतम वेती आवगीच. गोर आदर्श संस्कृतिन यी घटना काळीमा लगारिछ. येन कृतघ्नपणो, अमानवियता मानी चाय, असो मन वाटछ. दूसर वात, मार जन्मदनेर दन जे गोरभाई-भेने, मन लांबो आयुष्ये मळी चाय करन प्रेमेखातर, सदइच्छा व्यक्त किदेछ; वो मापर, मारे विचारेपर समाजजागृति कार्यपर आनंद व्यक्त (प्रगट) किदेछ, येरो मन खुप खुप आनंद हुयोछ. अपणो बी सारी भाई-भेनोयुरो आयुष्य आनंदेम अन माता-पिता समाज अन देशसेवा करेकरता बढी चाय अस सदइच्छा व्यक्त करछू. अपनो प्रेम, आपुलकी, अस्था, आंघेरे काळेम बी हनुच बणो रिय असे अपेक्षा करन सारीन धन्यवाद दुछू, आभार मानूछू. जय माता- पिता सेवादन सुचना- केकेर जागेपर याडीबापेर (बसारन) मेलन सत्कार वेयी चाय असो मन वाटछ. अपणो सारीरो चाहता प्रा. ग.ह. राठोड