दि. 11-5-2022
गोर बंजारा समाज इसवीसन 2000 तानी घोर निंदेम सुतोतो. 2000 रेरे वर्ह काही सामाजिक बांधिलकीती बंधे लोकसमाज जागृत करेरे काम कररेछ. अनेक संघटना निर्माण वेन आप आपणी बडीती समाजेम चेतना निर्माण करेरो प्रयत्न कररेछ. यी चेतना, जागृती, समाजेर नामेर कार्य काई योग्य अन काई अयोग्य सुद्धा वे सकछ. कार्य मे सुधारणा लायरो समाज विद्वाने वडीती जरूर वेयी चाय. पण कुचितपणेती, द्वेषी भावनाती, मोटोपणो कोनी मळो करन मन पुछे कोनी, मारो नाम घाले कोनी करन समाजेरे कार्यन अन कार्यक्रम लेयेवाळेन बदनाम करेरो, कार्यक्रम अच्छो न वेयी चाय किंवा बिघडी चाय करन कटकारस्थान रचेरो प्रयत्न करेवाळ समाजेर दशमणच समजे जायी चाय. दूसरे समाजेम म्हणजे बामण, बनिया, गुजराती, माळी, मराठा, राजपुत अन इतर समाजेम भारतेरे स्वातंत्र्येती अनेक प्रकारेर कार्यक्रम वेते आरेछ. ओनुम कार्यक्रम बिघाडेरो अन बदनाम करेरो कोई प्रयत्न करेनी. उलट प्रचार-प्रसार करछ. मदत करन, कार्य यशस्वी करेरो प्रयत्न करते आरेछ. पण गोर समाजेम कार्य बिघाडेर, बदनाम करेर, मदत न करेरे, मदत करेवाळेन बहकायर, चढाओढ करन दूसरो कार्यक्रम लेतानी लेये हुये कार्यक्रमेन कमजोर करेर. कार्यक्रम बिघडेपर आनंद व्यक्त करेरो, हासेरो यी संस्कृतपणो न रेता विकृतपणो छ कार्य न मानेरो. समाजेरी विकास गतीम अडथळा लायवाळ असे शिक्षित, अशिक्षित, अधिकारी, व्यवसाई, विद्वान, लेखक, साहित्यिक समाजेर सेती मोटे दशमण अन पापी छ, असो मारो प्रामाणिक मत छ. समाजेम वेगवेगळी विचारधारा, जाती, धर्म छ. पण सारी भारतेर नागरिक छ. सारी परस्पर भाई-भेन छ. सारीन बरोबर लेन चालेरो, कोई केरो द्वेष न करी चाय, नानक्या मोटो न मानी चाय, येमच माणुसकी अन मानवता छ. देशेर एकच घटना छ. घटना सारीरो सन्मान करन सेन स्वातंत्र्य देनेलोछ. पछ, हिंदु, मुसलीम, सिख, इसाई, पारसी, बौद्ध, जैन वगैरोरो परस्पर द्वेष करणु येन भारतीय नागरित्व केतु आयनी. गोर बंजारा जीवनशैली तो सारीच जातेरो, धर्मेरो, देवेरो सन्मान करती आरी छी वाद विचारेपर चाय. समाज अन व्यक्तिपर विवाद, भांडण समाजेन अतिघातक छ. कुणसे बी सामाजिक कार्यक्रमेन धनशक्तीर गरज छ. गोर समाज तो निर्धन छ. धनवान मोजकेच छ. समाज कार्य सारू न मागता बी धनवानेवून मोटे पणेर अपेक्षा न करता पुढाकार लेयी चाय. असे फलनिरपेक्ष, मोटोपणो निरपेक्ष धनवान जे समाजेम छ, असोच समाज प्रगती कर सकछ. राज कर सकछ. जे समाजेम मोटोपणो मांगेवाळ, पण अंगचोर रछ, असे समाजेरो विकास वियेनी. नकल करन दी-चार पुस्तके लखेवाळो अन धार्मिक अभ्यास करेवाळो माणस बी विद्वान वे सकेनी. परिवर्तनवादी साहित्य वाचन, विचारेम अन समाजेम परिवर्तन घडान लायेवाळो समाजेन स्वावलंबी, संघटित, संघर्षशील, स्वाभिमानी अन सताम बसारेवाळोच खरो विद्वान अन समाज सेवक वे सकछ. समाजेन बिघाडेवाळो समाज बिघाड, उचका, स्वार्थी, समाजद्रोही वे सकछ. समाजेर कार्य स्वार्थ अन मोटेपणे सारून न वेणू आतरिच अपेक्षा छ. आजेरे काळेम समाजेन फोडे ऐवजी जोडेरो अन हक्क अधिकारे सारू लढेरो यीच महान कार्य छ. असी जाणीव सारी गोर समाजेम वेणु अस नम्र विनंती छ.
प्राचार्य ग. ह. राठोड
अध्यक्ष- अखिल भारतीय गोर बंजारा साहित्य संघ, भारत.
