कुणसी बी संस्था, संघटना, पक्ष वगैररं निर्मिती, समाज अन देशेर गरज अन्याय अत्याचारेर निवारण करता वछ, देशेम अनेक समाज अन संस्था, संघटना, पक्ष सुद्धा छ,सारी ये संस्था संघटना पक्षेवूरो एक अथवा अनेक विचार अन हेतु रछ, ये तीनी संघटनापर जे विचारेरे, विचारधारा नीती अथवा तात्विकतारो प्रभावी संस्कार, शिक्षण किंवा धडा, सिकवण देयी हुई र छ, ओ नीती अथवा धोरणेर पूर्तता करेरे कामेम संघटना लाग जावछ. पण उद्देश पुरो करे सारु संघटना माहिर सारी कार्यकर्तावूम प्रथम एकी, पक्को विश्‍वास अन परस्परेवूणर भरोसो, आर्थिकसाधन, निस्वार्थपणो, त्यागभावना, व्यवहारेम पारदर्शकता, चारित्र्य संपन्नता, अभ्यास, वक्तृत्वकला, सामाजिक बांधिली, संघटन कौशल्य, असे अनेक गुणस्वभावेर गरज रछ. तनमनधनेती सेवा,काम करेर भावना, प्रसिध्दी अन मोटेपणेती दूर , घणम रेहेर तयारी अन हेतु पुरो करेरो दृढ निश्‍चय चावछ. उपरेर गुण स्वाभाव वैशिष्ट्य जे संघटनाम छ, हेतु सुद्धा पुरो कर सकछ, आजी एक विशेष बात छ कि कोई बी संघटना जात, धर्म,पंथ, सप्रदायेरे नामेती भेदभाव न करी जाय अन जो संघटना पक्षपात, भेदभाव बाळगोछ, येरे कहता एकी संघटनाती अन्याय दूर न वेतो विय तो सारी किंवा काही संघटना क्षेत्रिय पातळीपर भरुण काम करणू, संघर्ष करणू,आवश्यक छ.येरे करता संघटना प्रमुखेवून पुढाकार लेयरे सुद्धा गरज छ.गोर समाजेर अन बहुजन समाजेर संघटनार एकी जर करे बिना लो प्रत्येक समाजेर संघटना प्रमुख भळण सारी समाज अन संघनार एक शिखर समिती बणान संघटना समाज जाडेरो, सोबतच संघर्ष करेरो. प्रयत्न आजेरी घडीम मन जरुरी वाटछ. येरे बरोबर संघटनावूर काम नियमित चाले सारु विशेष निधी उभी करन वारे व्यवहारेवूम पारदशर्शकता ररवाडी चाय. आज देखेम अयरोछ भि वैयक्तीक मोटेपणा अन स्वार्थसारु संघटनावूम फुट पडन वोरी अनेक शाखा निर्मीण वेरीछ ये कारणेती समाजेम संभ्रम निर्माण वेतानी, संघटनावूपरेरो विश्‍वास कमी वेरोछ अन संघटना अन संघटना प्रमुखरो समाजे रो विश्‍वास उठतो जारोछ. ये सारी घटना समाजे करता घातक छ, करन सारी संघटना प्रमुखेपर आज चिंतन करन संघटनावूर बळ अन एकी बढायेर गरज छ. जयभारत- जय संविधान प्राचार्य ग.ह.राठोड