दि. 26/05/2022 गोर भाई-भेनो, साहित्य संमेलन कुटुंबेसह हजर रो. गोर साहित्य संमेलन यी गोर भाई-भेनेवूर भेट, वळख, विचार, चिंतन, मनन, मंथन, विचारेर देवान-घेवाण, समाजेरी अडचणेवूप चर्चा, आडचणे छडाय सारू सामुहिक प्रयत्न, साहित्यिकेवून प्रेरणा, गुणवंतेवूरो सत्कार, संघटन, शिक्षण, सता, रोजगार, बेकारी, वंचितपणो, ओसे अनेक विषयेपर हितगुज करे करता लेयेम आवछ. संमेलन सारी समाजेर हिते करता, एकी, संघटन, हक्क अधिकार, सुख, शांती, समृद्धी, मनोरंजन, ज्ञान, आनंद, खुशी, कलागुण, प्रदर्शन, सभ्यता, संस्कृती, पोषाख, अलंकार, व्यवसाय, बोलीभाषा, स्त्री-पुरुष शिक्षण प्रसार, अन्याय, अत्याचार वगैरेपर चिंतन, मंथन, दिशादर्शन वगैर करता लेयेम आवछ. संमेलनेम उपरेरी सारी वातेवूपर मंचेपर चर्चा विय अन मार्ग निकळीय हनु ठापणे केतु आयेनी, पण मंचेपर अन मंचेरे बार संमेलनेम हजर सारीच लोक चर्चा करते रछ, यी संमेलनेर मोट जमा बाजु रछ. अखिल भारतीय स्तरेपर तीन-चार किंवा पाच संमेलनेवूर गोळा बेरीज करण वाद निर्माण करेम अन समाजेम फुट पाडेम कांही अर्थ छेनी. सारी समाज एके विचारेती संघटीत न रेहेर कारण अडाणी अन असंघटीत समाजेम काही दोष, दखान आणु स्वभाविक नात छ. पण दोषेपर अंगळी मेलन समाजेम फुट पाडेपेक्षा समाज जोडेरो अन भविष्यम दोष दूर करते रेहेरो यी महान काम छ. मान-सन्मान कोणी मळो करन पेटेम दु:खे देयेपेक्षा कळ सहन करन संमेलन यशस्वी करणु यी विद्वान अन समजदार समुहेरो महान काम छ. समाजेम एकी रेती. एके विचार रेतो तो संमेलनेरी संख्या बाबतबी वाद कोनी वेतो. पण अपणो समाज मान सन्मानेरो भुको रेहेरे कारण समाज हित, समाजेरी एकी, संघटनेरी महत्त्व न कळेरे कारण नव विकासीत समाजेम वाद वेणु, रुसना, फुगना वेणु स्वभाविक छ. पण अपने असंघटीत पणेरो फायदो शत्रु लेरोछ, ये समस्या सामु धेन देणु गरजेर छ. शत्रुन चमचा, दलाल, कत्रार, तीतरेर गरज रछज. शत्रुन असे चमचा पळे मत दोडान समाज मजबुत, संघटीत कु बणातु आये येरा विचार ाअपण 28-29 मे न वाशिमेम वेयवाळ संमेलनेम सामुहिकपणे करा असो मारो सारी गोर भाई भेनेवून आवाहन छ. प्राचार्य - ग. ह. राठोड, अध्यक्ष - अखिल भारतीय गोर बंजारा सेवा संघ, भारत.