आपने समाजेमा तांडे तांडाऊम, गामेम आणि शहरेंम घने होतकरू छोरी छोरा छ, पन वो कणायी मार्गदर्शन न मलेती लार रे जावछ, नि तो वनेनं व्यवसाय करे सारू भांडवल कमी पड जावछ. यदा कदाचित भांड्वल मल बी गो आणि व्यवसाय चालू भी कर नाके तो वन माल वेंचेसारु आछो भाव किंवा लेयेवाळो मलेना तक्लीफ वे जावच्छ. कणा कणा तो खेते माहीर माल भी कमी किमतें म वेंचणू लाग जाव छ. येरे सरिक अनेक कारणेती आपण आंघ आ कोणी सक्रे छा.

पण आब आपने समाजेमा जेना जेना व्यावसायिक मार्गदर्शन चावछ, जेना जेन स्वतः रो व्यवसाय करेरी इच्छा छ, वो शेनून गोरसेवा रे संकेत स्थळे पर मदत नितो मार्गदर्शन मळ सकच्छ. तम् फक्त आपळो व्यवसाय करेरी इच्छा छ कि कोणी येरी नोंद करनु आणि तमार व्यावसायिक संकल्पना वताळनू . तमार व्यावसायिक संकलपना जर गोरसेवा परेर गुंतवणूक करेवाळे लोगून पसंद आवगी, तो तम तमार व्यवसाय चालू कर सकोछो . गोरसेवा रे उपर अनेक शिके साके, दनीया देके विये, पिसावाळे, विविध क्षेत्रे माहीर अधिकारी, व्यावसायिक, भांडवलदार, इतर सभासद आणि तमार मित्र परिवार मलतानीन तमनेनं व्यवसायेरी विविध संधी उपलब्ध करण दे सकच्छ, नितो तमार व्यावसायिक भागीदार बन सकछ, नितो तमनेनं प्रोत्साहित कर सकच्छ नितो तमार ग्राहक बन सक छ. तम जत ऱोछो वत तमार व्यवसाय चालू कर सको छो. जर खेती करो छो आणि तमनेनं बाजार भाव आछो कोणी मलरो विह्व तो आंग चालन गोरसेवा तमनेनं वर माही भी मदत करन, तमनेंना अछो बाजारभाव मळन दे सकछ. अत्राच कोणी तो तमनेनं व्यवसाय करेरो कोणी विह्या तो नोकरी शोधे सारू भी मदत कर सकच. काम थोडा मोटो छ, पन आपण शे भळण किदे तो कायीच छेनी.

गोरसेवारी ई योजना/संकलपना/आयोजन तमनेनं पसंद आवगी विये तो गोरसेवाती जरूर जुड जाओ. तम जर दुसरेन मदत/मार्गदर्शन कर सकोछ तो जूड जाओ, तमनेना अगर मदत चावती विह्य तो भी जूड जाओ. तमनेनं समाज आंग ले जायेर विहय तो जूड जावो.

तमनेनं जर दुसरेना मदत करनु अछो लागतो विहय तो ई माहिती दुसरे गोरून मेल दो. वे सकच तमारेती केरो तो भी भलो वे जाहय, अन समाज आंघ जायेन मदत विह्य?

आओ, सेवाभाया रो सपनो पूरो करा, गोरसेवान जूड जावा.