दि. 26/05/2022 सारी काही बुद्ध 1) सिद्धार्थ गोतम बुद्ध बहुजन शोषक मनुवादेरे विरोधेम प्रथम क्रांती किदो. 2) सिद्धार्थ बुद्ध धम्म नामेर मानवी, नैतिक, वैज्ञानिक विचारधारार प्रस्थापना किदो. 3) आज पुरो विश्‍व भारत देशेन तथागत बुद्धेरो देश नामेती ओळखच. 4) जगेर बहुसंख्य देशेम आज धम्म विचारधारान मान्यता छ. 5) पुरे भारतेम आज बुद्धेरीच लेणी निर्मित अन दर्शनीय छ. 6) संसदेम बुद्धेरधम्मचक्र परवर्तनेर प्रतिमा बसारी हुयी छ. 7) भारतेम प्रत्येक खोदकामेवूम, मंदिरेवून बुद्ध प्रतिमा सापडरीछ. 8) भारतेम अन जगेम सेती ज्यादा प्रतिमा बुद्धेरीच छ. 9) बसवेश्‍वर, रविदास, कबीर, नामदेव, तुकाराम, नानक, छ. शिवाजी, रा. शाहू, म. फुले, डॉ. आंबेडकर, कांशीराम, उपरेकाका, ये सारीच महापुरुष बुद्धेन मानतेते. 10) सेवालाल बापु, आत्माराम राठोड, नायक बापु येनेरे विचारेवूम बुद्धेर विचार भरे हुयेछ. 11) कयक बामण, मराठा, बहुजन, भटके धम्म विचारधाराती जगरेछ. 12) आचार्य रजनीस, स्वामी विवेकानंद, संत तुकडोजी, गाडगेबाबा असे अनेक महापुरुष, विद्वान, विचारवंत धम्म विचारधारा म्हणजे बुद्धेर विचारधारा मानतेते. 13) बुद्ध यी धर्म छेनी. बुद्ध यी सिद्धार्थ गोतमेन जनतावडीती दियी हुयी पदवी उपाधि, सन्मान पद छ. धम्म यी पाली भाषारो शब्द छ. 14) बुद्धेरो अर्थ तर्कशुद्ध, वैज्ञानिक, मानवी, अविकृत ज्ञानेरो खजाना छ. 15) धम्मेरो अर्थ नीतिमार्ग, सर्जन, कल्याण, निर्माण, सुख, आनंद, शांती मार्ग छ. 16) धम्म विचारधाराम समता, बंधूता, स्वातंत्र्य, न्याय, संवेदना, प्रेम, सहकारीता खचाखच भरो हुओ छ. 17) धम्मेम धमेप्रमाण जाती, धर्म, देव, देवी, कर्मकांड, तिर्थक्षेत्र, दान-दक्षिणा, यज्ञवाद, अवतारवाद, नानक्या मोटो असी विकृत, अवैज्ञानिक वाते छेनी. 18) सिद्धार्थ गोतम बुद्धेर पंचशील वंदनीय सेवालाल बापु पाच पारारे रूपेम स्वीकार करमेलोछ. 19) सिद्धार्थ बुद्धेन मूर्तिपूजा, मंदिर, तिर्थक्षेत निर्माण, व्यक्तिपूजा, भगत-भोपावून सक्त विरोध रे. वंदनीय बापून सुद्धा उपरेरी सारी वातेवून विरोध केततो. 20) गोर लेखक, कवि, इतिहासकार कालवश आत्माराम राठोड केगोछ की, ‘सगरास सिद्ध आम्ही, युद्ध व्हावे भारती। सेनापती बुद्ध हवा, कृष्ण नको सारथी’, येरो थोडाम अर्थ सोबत बुद्धवादी जनता चाय. हिंदुत्ववादी (ब्राह्मणवादी) न चाय. 21) संत तुकडोजी बुद्धेर स्तुती करतो केगोछ की, ‘हाती न घेता तलवार, बुद्ध राज्य करी जगावर, त्याचे कारण, एक प्रचार प्रसार महान’। 22) चलो बुद्ध की ओर, येरो अर्थ अंधश्रद्धा, अज्ञान, निरर्थक धर्म-देव, दैव कर्मकांडेवूरो विकृतिवूरो, त्याग करन वैज्ञानिक, बुद्धिप्रामाण्य, मानवतावादी, समतावादी ज्ञान प्राप्त करो. परोपजीवी, शोषणवादी, श्रेष्ठ-कनिष्ठवादी जीवनशैलीन छोडन उपेक्षित, वंचित, दूर्लक्षित श्रमजीवीवून, सोबत लेन चालो. सिद्धार्थ गोतम बुद्धेरे धर्ममे स्त्री-पुरुष, धर्म, जाती, देव भेद छेनी. धम्मेम स्त्री अन पुरुष असे दीच वर्ग छ. ब्राह्मण, क्षत्रिय, वैश्य, शूद्र अन अतिशूद्र वर्ग छेनी. रोटी-बेटी व्यवहारेने वर्णेरे आधारेपर बंधन छेनी. छिपाछिपी छेनी. बुद्ध अन हिंदू तत्त्वज्ञानेम पूर्व पश्‍चिमेरो फरक छ. शिक्षण, पोषज्ञख, अलंकार, धंदो, विचार, पद, वर्ण, संपती, विदेशी प्रवास, आहार, निवासबंदी छेनी. स्त्री-पुरुषेवून समान अधिकार छ. 23) हिंदू, मुसलीम, इसाई, पारसी, ब्राह्मणी धर्मेवूती धम्मरो तीळमात्र संबंध छेनी. उपरेर धर्मेवूम जू अन्याय, अत्याचार, विषमता, भेदभाव छ व सो धम्मेम काहीच छेनी. बुद्ध यी सिद्धार्थ बुद्धेन देयी हुई पदवी छ. बुद्ध यी नाम छेई. विशेषण छ. यी बुद्ध नामेरो विशेषण सिद्धार्थ गोतमेन देयेम आयो हुयो छ. यी बुद्ध नामेरो विशेषण सिद्धार्थ गोतमेन देयेम आयो हुयो छ. धम्मेर प्रस्थापनाप बुद्ध कोनी सिद्धार्थ गोतम करमेलोच. सिद्धार्थेरो कुळ, गणेरो नाम शाक्य गण छ. शाक्य गण यी खेती कर जोतो, कोळी गण यी कपडा निर्माण करतोतो. यी कोळी गण सिद्धार्थेर आजोळ छ. सिद्धार्थेर बापे नाम शुद्धोधन अन याडीरो नाम मायादेवी, मासी याडीरो नाम प्रजापती छ. तीसरो गण वज्जीगण छ. यी व्यापारी गण छ. ये गणेम ववंज, तक्षक, सार्थवाह, कर्कोटक वगैरे समाज समुह आवछ. ये काही समुह गोर बंजारा छ. डॉ. नवल वियोगीरी अनेक पुस्तकेवूम ये गणेवू बाबत सविस्तर माहिती मळछ. ये तीन्ही गणसंघेरी म्हणजे शाक्य, कोळी अन वज्जीवूर जीवनशैली यी धाटीच वेतती. ये धाटीरो परिवर्तीत नाम आजेरो धम्म छ. धम्म यी जीवनशैलीर धाटीरे रुपेम धम्म पूर्व काळेती अनुसूचित जाती, जमाती, आदिवासी, भटके लोकूर अभिन्न अंग वेतती. संतोत वेयेरे कारण आजेरो सारी परिवर्तन दखान आरोछ. सारी धर्मेवूरो तुलनात्मक अभ्यास करेरे बादच भारतेरो सारी खरो इतिहास कळन आय. इति. जय भारत - जय संविधान - जय जगत प्रा. ग. ह. राठोड