पेणार म्हणजे इ.स. पूर्व ७५०0 ते ७000 साले पूर्वेर म्हणजे आजेती ९५00 वर्षेपूर्वेर सिंधु संस्कृती यी मातृसताक म्हणजे याडीप्रधान, याडीप्रमुख संस्कृती, सभ्यता वेतती. आजेरे काळेम म्हणजे बामणी वरचस्वेर बादेर संस्कृती यी पुरुषप्रधान म्हणजे बापप्रमुख संस्कृती, सभ्यता छ. बामणी सतापूर्वेर परिवार प्रमुख मात्र सर्वत्र याडी वेतती. बाप याडीरी आज्ञारो पालन करतोतो. सिंधु संस्कृतीरे राळेम (क्षेत्रे) मोहेजोदाडो, कालीबंगा, चणो दडो, हरप्पा वगैरे प्रमुख नगर वेतते. हरप्पा यी नगरा (शहर) बहुतेक राजधानीरो शहर विये. करन ये राजधानीर प्रमुख याडीन (परिवार प्रमुखेन) हरप्पणी केतेते. कारण पणी यी एक समाज समुह वेततो. ये पणी समाज समुहेर याडी यीच प्रमुख रेहेरे कारण अन राजधानी हरप्पाम रेहेरे कारण वु हरप्पणी केहेलाती विये असो मारो तर्क छ. यी हरप्पार पणी म्हणजे हरप्पणी सिंधु सभ्यतार प्रमुख, सर्वाधिकार संपन्न, बहादुर, सिंधु नगरेवूरे खंदकेवूम जहाजे चलायेवाळ, खंदकेवूम पोहेवाळ, शत्रुरो सामना करेवाळ, शासन व्यवस्था, परिवार व्यवस्था सारीच देखेवाळ अथवा चलायेवाळ रेहेरे कारण हरप्पणी बाई अतिशय बहावा काल कर्तबगार, सारीन याडीरो प्रेम व्यवहार देयेर कारण अतिशय सन्माननीय, वंदनीय मानी जाती विये, यम शंका न लेयी चाय, आज बी कुणसबी याडी जे जबाबदारीती घर-संसार चलावछ, वो जबाबदारीती बाप चलायनी. करच पेणार विचारी, विद्रान लोक घर, समाज अन देश प्रमुखेर जबाबदारी याडीन देमेलेते यी वास्तव छ. आज बी याडीर बरोबरी बाप कर सकेनी. करन आजेरी याडी-भेनेवून शिक्षण देतानी, संस्कारेरी, परिवारेरी, समाजेरी, देशेरी जबाबदारी याडी भेनेवून देयेर गरज छ, असो मन वाटछ. पणीरो अर्थ पाणीम रेहेवाळो. पाणीम पोहेवाळो, पीसावाळो अन व्यापारी, व्यापार करेवाळो, रोखेती, रोकडाती व्यवहार करेवाळो पिशाची, पाली बोली बोलेवाळो प्राकृत भाषा बोलेवाळो असे अनेक अर्थ प्रगट वछ. हरप्पा रेहेवाळे ये पणी (गोर) समुहेरो इतिहास बामण नष्ट कर नाखेछ. धुंडेर घण मोट गरज छ. प्रा. ग. ह. राठोड