गोर (पणी) समाज बारा मिन्हाम एक वणा होळी नामेरो सन मनावछ. ये होळी सनेर एक मिन्हा आंघेती तयारी सुरु वेजावछ. एक मिन्हा आंघ दांडो गाडो जावछ. दांडेरे चारी बाजुती रोज रोज एक एक छणीरो गंज तांडावाळे घालते रछ. एक मिन्हारे बाद ओपर लकडी, पालापाचोळा रचन फालगुण मिन्हार पौरणीमान परभाती परभाती पपोळी फाटतु वेळान होळी सळगादछ, अन लेंगी म्हणजे भांड गीद गाथाणीन तांडा समुह नाचन आनंद मनावछ. होळी सन, तेवार कराती मनायो जावछ, यी नक्की केतु आयनी, हेटेरी घटनारे आधारेपर होळी राजा हिराण्य कश्यपुरे काळेती मनाते आवछ असो कळछ. पण गोर कोर सारीच लोक होळी सन साजरो करछ. कोर समाज होळी सांजवणा सळगावछ अन गोर लोक ओच दन परभाती होळी सळगांवछ. प्रसिध्द लेखक एस. एल. सिंहदेवेरो केणो छ की होळी सन यी पेणार काळेती म्हणजे नग्न अवस्थाती वजाळेर निमतेती अन अंगार टकान रेखाडे वासु सतत सळगान रखाडी जातीती. राजा हिराण्य कश्यपुरे (हिरा किशारे) काळेती होळी सन नवीन छोरार संस्कार करेरे निमतेती सळगाई जावछ. संस्कार करेरो कारण असो केहो जावछ की राजा हिराण्य कश्यपुरो छोरा भक्त प्रल्हादेन बामण दारुर नादी लगान बापेरो राज मांगेन लगाड मेलेते. बामण घणे राजावुन जीत लिदेते. पण हिराण्य कश्यपु कोनी जीतातोतो. करण बाप-बेटाम फुट पाडन हिराण्यकश्यपुरो घात करेरो प्रयतन बामण कररेते. ये कोशीसेम बामणेवून यश मळगो. दारुरे नादेती बामण प्रल्हादेरे घर आते जाते रे अन एक दन राजा हिराण्य कश्यपुरो निंदेमछ हत्या करनाके. तरी प्रल्हाद सुधरो कोनी. दारु पीतानी कतीबी पडो रेतोतो. होळी प्रल्हादेर फुकी वेतती. वोरो वाह्या ठरगोतो. पण प्रल्हाद घर कोनी आयो करन ओन ढुंढेन होळी गी तो बामण लोग होळीन पकड लिदे,ओर इज्जत लुट लिदे अन बाळनाके. होकी होटो कहा आयनी करन राजार सेना ढुंडेन निकळीतो होळी बाळण मारमेले जको पुरावा सापडो. होळीरो बदला लेयेसारु सेना बामणेती रातभर लढी अन बामणेवून मारन परभाती परभाती ओनुन बाळण आनंद साजरो किदे. करन कोर सांज होळी सळगावछ. पण गोर समाज मात्र होळी परभाती सळगावछ. सारी रात बामणेवून घेरन, पकडन, मारन, लाताणीन ओनुन होळीम फेकन खाक करन होळीरे चारीवडीती घेरा घालन नाचन होळीरो बदला लेयेर आणदेम नाचछ, गीद गावछ. होळीम एक एरंडी झाडेर फांदी प्रल्हाद फुफी होळीर प्रतिक रुपेम पांच छो घीयेम तळी हुआ, सुवाळी बांधन उभी करदछ. मात्र होळीन अंगार लगाते बरोबर मोटीयार छीचापर एरंडी फांदी काढन धास जावछ अन कतीतोबी पाणीम फेकदछ. हेतु असो रछ की होळी प्रतिक रुपी फांदीन जर अंगारेर आंच लागगी वियतो पाणीती ओन आराम मळीय अन बच जाय. फांदी लेन धासेवाळ पोरीया घी सुवाळी खातानी खुशी मनावछ. कोरीकोर होळीर बना बदलो लेयर आंघ रातच होळी सन साजरो करछ. पण गोर समाज मात्र गुन्हेगारेवेन पकडन परभाती होळीम बाळण होळीरो बदलो लछ. प्रल्हादेर फुफी होळीरे बलिदानेरे कारण होळी सनेरो नाम होळी पाडो हुओछ, येम शंका छेई. गोर जो गेर रमछ यी गेर रमती बामणेवून घेरन मारे करन ये रमतीन गेर (घेर) रमती कछ. आज गोर समाज ये गेर (घेर) रमतीरे दन बकरा-दारु सारु पिसार भीक मांगरेछ. यी होळीमातारो अन गोर बहादुरेवुरो अपमान छ. गेर (घेर) रमतीम पिसा मांगणु यी भीक छ, अन भीक न मांगेवाळे गोर समाजेरो बी यी अपमान छ. करन आतेती आंघ गेरेम (घेर) रमतीम पिसा न मांगता होळी सनेरो इतिहास वताताणी गोर समाजेम जागृती फैलाणू अन दशमणेर ओळख करायेर प्रतिज्ञा करणु आस मार गोर समाजेन जाहिर विनंती छ. प्रा. ग. ह. राठोड