गोर भाई-भेनों, सारीन जय भारत, जय संविधान. सारी भाई-भेनेवून एक महत्त्वेर वात धेनेम लेणू गरजेर छ की, हजारो सालेती तांडा वस्तीन जोडन किंवा तांडा वस्तीम रेहेवाळो, तांडावस्तीर लोकूती घट दोस्ती, प्रेम, अपणेपणेर, भावकीर भावना अथवा संबंध रखाडन रहेवाळो सारीर सारी भटको समाज, इतर मागास समाज अन काही प्रमाणेम मुस्लीम समाज, ये सारी समाज हजारो सालेती गोर समाजेती भावकीर संबंध रखाडन रेते आवेछ. प्रेेमेखातर सोबत रेतानी मदत करते आरेछ. बेटी व्यवहार छोडन जादा भेदभाव करेनी. मळन जळन रेतो आरोछ. निवडणूक प्रक्रियाम सहयोगी करन सोबत रछ. मदत करछ. करन ये सारी समाजेन गोर समाजेती जोडन रखाडेर भावकीर संबंध रखाडेर घण मोट गरज छ. बाकीरो प्रस्थापित समाज जो सौतान घणो श्रेष्ठ मानछ. जातीवादी, धर्मवादी, कर्मकांडवादी, बामणी गुलाम छ अन छिपाछिपी मानछ, असे सारी समाज अपणेती मनेमाहीती प्रेम करेनी किंवा भावकीरो माणुसकीरो संबंध रखाडेनी. गोर समाजेन कानेहेट रखाडेरो गुलाम बणायेरो राजकारणेम न आयदेयेरो अन राजकारणेम वापर लेयेरो काम करते आरेछ. हक्क अधिकार देयेन तयार सहसा रेहेनी. गुणवत्ता, गरज, बुद्धिमत्ता हक्केरो विचार न करता फक्त जातभाईरोच विचार करते आरेछ. असे लोकूती संभाळण रेहेर अन मागास वर्गेवून जास्तीत जास्त संख्याम जोडन राजकारणेम उतरेर घण गरज आज छ. राजकारणेम उतरन हक्क अधिकार लढन, खोसन लेये बगैर सारी मागासवर्गेरो कल्याण, प्रगती वेयवाळ छेनी, येर जाणीव रखाडण धण गरजेर वात छ. करन केणो छ की आतेती आंघ शत्रुती घणम रो अन मित्र समाजेन, सहयोगी, भावकीरे समाजेन घट जोडेरो काम करो. प्रस्थापित जातीवादी वर्ग, समाज फक्त मतदान करताच गोरुरो वापर करतो आरोछ. राजकारणेम, नोकरीम, उद्योगधंदाम घुस कोनी देरोछ. गोरुम, मागास समाजेम फुट पाडन, लालच देन, विकत लेन राजकारणेपर कब्जो करन गुलाम बणान मागासेवून वापरेरो कपट कारस्थान श्रेष्ठ, प्रस्थापित, धनवान, जाती, धर्मवादी समाज करतो आरोछ. यी सत्य ओळखन राजकारण हातेम लेयर आज गरज छ. येच बरोबर आज ठराविक समाजेरे वर्चस्वेन, धनवानेवूरे वर्चस्वेन अन ठराविक समाजेरी घराणेशाहीन सुद्धा जाणीवपूर्वक विरोध करेर मोट गरज छ. देश स्वतंत्र वेन 75 साल वेगेछ. पण कुणसोच पक्ष मागास समाजेर हक्क, अधिकार हिस्सो देयन तयार छेनी. करन आज जो पक्ष मागास समाजेर जनगणना करन लोकसंख्यारे प्रमाणेम सारी क्षेत्रेम हिस्सेदारी देयेन तयार विय, ओनच मतदान करेरो. आज कुणसोच सत्ताधारी पक्ष मागास समाजेन न्याय देयन तयार छेई. करन आज रोजी सारीच सत्ताधारी पक्षेवूपर बहिष्कार नाखन मागास समाजेवूर पक्षेवून किंवा केवळ मागास लायक लोक प्रतिनिधीवून निवडन लायर गरज छ. सेरे करता मागासवर्गीय पक्षेवूम एकी बढान, मागास समाजेर लायक प्रतिनिधी निवडन सत्ता हातेम लेयेर, आज गरज छ. करन विनंती छ की कोई मागास पक्ष किंवा मागास लोक प्रतिनिधी प्रस्थापित पक्षेर किंवा नेतार बळी न पडता, विक्री न जाता मागास समाजेरो एकच लायक प्रतिनिधी निवडन लायरो सारीवन प्रतिज्ञा करी चाय. समोरासमोर कोई मागास प्रतिनिधी चूकन बी न उभो रो तो मागास प्रतिनिधी निवडन सहज आ सकछ. फक्त मागास समाजेन संघटित नेतानी विचारपूर्वक सत्ता हातेम लेयेर प्रतिज्ञा करेर खरी गजर छ, असो मन वाटछ. श्रीमंत, जातीवादी, आजेरो सत्ताधारी समाज मागास समाजेन न्याय देयेर शक्यता छेनी. करन सारी मागास समाजेन अन सारी मागासपक्षेन किंवा समविचारीवून संघटित संघर्ष करेरी आजेर गरज छ. भाजप पक्ष अन आर.एस.एस. परिवार ये मागासवर्गेर लारेर पाच हजार सालेती दशमण छ, ये सत्यन ओळखेर बी गरज छ. बामन, बनिया, गुजराती, राजपूत, ठाकूर, पारसी ये लोक कुणसे बी पक्षेम रेतोवो मागासेन न्याय देयनी अन देयवाळ छेनी. येरे करता ये लोकून निवडन लाणु किंवा समर्थन देणु, यी घोडचूक अन मोटो गुन्हो समजो जाई चाय. करन मारी ये नीती धोरणेपर सारी गोरभाई-भेन विचार करन जागृत विय अन समाजेन जागृत करीय अस अपेक्षा करछू. इति: आपला हितचिंतक गहरा चिंतन