दि. 26/2/2023 धाटी मार याडी, याडी मार धाटी धाटी नियमेती म्हणजे उपजत, अंगभूत, प्रकृति, याडी, चेतन वहिवाटेती जीवन जगेवाळो समाज किंवा जनसमुह, गण, गट, वर्ग, टोळी, संघ. ये समाज समुह गण, गट, वर्ग, टोळी, संघेर मार्गदर्शक, वाटाडी, संरक्षक, पाळक नायिका म्हणजे जन्मदात्री याडी. याडी म्हणजे शुद्ध प्रेमेरो, जीव्हाळारो कर्तव्यरो जबाबदारीरो, संवेदनारो महासागर. याडी म्हणजे जीवन अन जीवन म्हणजे याडी. याडी म्हणजे चेतनारो, संवेदनारो, जीव्हाळारो महासागर, महासमुद्र, छत्रछाया, आभाळ. स्वामी तिन्ही जगेरो याडी बिना भिकारी. याडीरी महिमार मोजदाद कतीच छेनी. येच ढंगेती धाटी जीवन मार्गेती जगेम श्रेष्ठ काहीच छेनी. देव, दैव, धर्म, जात, धर्मगुरु, धर्मग्रंथ, धर्मक्षेत्र, धर्मभाई, धर्म याडी-बाप सारी काही, आतराच कोनी तो जीवन साथी तांडरी बी स्वस्थार्थेर ज्वलंत (आखी देखे) आड्डा किंवा उदाहरण छ. याडी (धाटी) सिकवाडी अन संस्कार, नियम, कर्तव्य, जबाबदारी बगैर सारी जग थोतांड, ढुंग छ. याडी (धाटी) यी प्रकृति, निसर्ग, सृष्टी, पूर्वजेवूरो अंगभूत, उपजत, तत्त्व गुण, स्वभाव, चैतन्य, खासियत छ. सारी जग येच तत्वेर, नियमेर, वाटेर, सिध्दांतेर चारीवडीती फरछ. दुसरो मार्ग अमानवी, विनाशी, स्वार्थभरो छ. गोर भाई-भेनों, जेन मानव समाजेरो संघर्षेरो इतिहास मालम छेनी. पालक गुलामेरो इतिहास मालम छेई. असो मानव, समाज गु-गोबर, गंदी नालीरे किडा प्रमाण यातना भोगतो रछ. मानवेर जनम करा हुयो, अन कतकत भटकरोछ, केतू अयनी. पण युरोप-मध्य आशियार भटके असभ्य बामण भारतेम आयेर आंघ गोर समाज सात सिंधू नंदिवूर काठेपर किंवा राळेम देव, दैव, धरम, जात, मूर्ती, मंदिरविहीन संघटीत, समतापूर्ण, वैभवशाली जीवन जगरोतो येरे प्रमाण वेद पुराणेवूम उपलब्ध छ. भटके बामण आर्य भारतेम आयेर बाद गोर समाजेम अन आर्य बामणेवूम संघर्ष कहा हुयो अन गोर समाजेर हार वेयर बाद आजेतानी दोई समाजेरो इतिहास सुद्धा वेद पुराणेवूम सापडरोछ. पण सत्य इतिहास मांडेवाळो अभ्यासु विद्वान तयार न वेयरे कारण सारी जगेम संभ्रम, अन्याय, अत्याचार अन चुकीरी घटना घडती जारीछ. आज देशेम बळी तो कान पिळीर अवस्था निर्माण वेगीछ अन कोई केरी वाते सामळेन तयार न रेहेरे कारण चोरूर चंगळ अन सन्यासीन फांसी दी जारीछ. खरो राष्ट्र निर्माता, विज्ञानवादरी, असंघटित, अशिक्षित समाज पडदे आड रेहेरे कारण देशेम परोपजीवी, अश्रमी, धनवान,सत्ताधारी, अधिकारी, उद्योगपती, मंत्री, धर्मांध, सत्तांध लोक भोगवादी जीवन जगरेछ अन राष्ट्रनिर्माता, राष्ट्रभक्त, विज्ञानवादी, कष्टकरी दु:ख, यातना भोगरेछ, यी एक भारत देशेर शोकांतिका छ. भटके आर्य भारतेम आयेर आंघ जात, देव, दैव, धर्म, निरपेक्ष भारतेम अन निरिश्‍वरवादी, अनात्मवादी, भौतिकवादी, विज्ञानवादी, बुद्धिप्रामाण्यवादी गौतम बुद्धेरे काळेम भारत देश सोनेरी चिडीया अन दुध, दही, घीयेरी नंदी वेरायवाळो भारत केहलावतोतो. पण भारतेम 33 कोटी देव-देविवूरो जन्म वेताच देश भिकेन कहा लागगो, येरो विचार आजेर लोक कररे कोनी छ. खाद्यपेय पदार्थ पुरायेवाळ अन देशेर संरक्षण करेवाळ लोक हाल अपेष्टा भोगरेछ. दूसरी वडी मानव निर्मित धातु, काष्ठ, भाटा, चित्रेर देव सोनेती मढे मंदिरेवूम विराजमान छ. मानवी बुद्धिरो दिवाळो निकळगोछ, ये वास्तवेर ये सारी प्रमाण छ. बुद्धिवादी वर्ग तयार वेन, संघटित वेन संघर्ष करन नव निर्माणेर प्रयत्ने बगैर प्रकार बंद पडेवाळ छेनी. संविधानवादी सारी संघटीत वेय बगैर देव-दैववादीरो, हिंदुत्व अन कुंभमेळारो संकट दूर वेयवाळो छेनी. जय भारत - जय संविधान प्रा. ग.ह. राठोड